'Tin Horancho Raza'

'Tin Horancho Raza' tiatristancher atthaploli kotha




Devan dilole gunn vapddun, thodde tiatrist thokos gheun vhoir sortat ani ghor-sonvsar kortat zalear, dusre apunn boroinnar ani digdorspi mhonn somzun, dusreanchea adaran porzolltat ani aplea oslo anink konnuch na mhonn gorvan bhonvtat. Ek tiatr lokamche avddicho ani 'hit' zatolo zalear kolakaram sangata kantoristanchi-i goroz mhonn Samuel Carvalho 'Tin Horancho Raza' hea aplea tiatrant spoxtt korta.

Ek tiatrist zaunchi khoxi asli dekhun, Joe (Neville)-achim avoi (Chitra) ani bapui (Succor de Santa Cruz) sogllo thokos gheun, aplea ektteach putak ek tiatrist kortat. To bekar ason-ui, fuddarak apleak adaracho zatolo mhonn somzun, tim taka logn'-ui korunk fuddem sortat.

Punn logn' zatoch, aple ghorkarn' Flavia (Synetra)-k lagon, Joe aplea avoi-bapaik visorta, tankam kikont korta ani apli bail sangta teach pormonnem doryant aplem voddem tanddta. Ek dis Joe-acho bapui gombhir piddek sampoddta. Tacheo don-ui 'kidneys' pidd'ddear zatat ani fokt aplem nanv sambhallunk, Joe taka Apollo hospitolant bhorti korta. Punn dor disa ilaza fattlean chodd khorch zatolo, hem chintun, ani tacho avoi-bapui gorib mhonn voizank fott marun, Flavia aplea sasupaik ghara haddta.

Aplo tiatr hanga-thoim dakhoun, aplea zanttea avoi-bapaik toxench aplea kuttumbak Joe-ak vell diunk mellona. Apli vaddti dhuv Zarina (Cybil)-achea xikxonnacher-ui lokx ghalunk ani favo to artik adar diunk Joe chukta.
Tacheach durlokxak lagon, Joe-acho bapui sompta. Toruiastona, tachea monar uzvadd poddona. Aple bailechea sangnnea pormonnem to aplem jivit fuddem vhorta. Aplo tiatr Paris-ak vhorunk melltole axen, Joe aplea eka kolakar Sonia (Sonia)-k aplea tiatrantlem bhair kaddta ani aple dhuvek eka famad tiatrista thaim nachunk sondhi dita.

Aple dhuvek tiatrantlem bhair kaddlem dekhun, Sonia-che avoi (Meena)-k khont zata, punn tache dhuve Zarina-cher aplo dollo dovrunk visornaka mhonn ti Joe-ak xiddkaita. Punn Joe apleach tiatrachea vavurant buddlolo asta. Sorv-xevttim, ek tiatrist koso Joe sasnank fottovta. Koso? Tache soglle kolakar xevott meren taka sangat ditat? Tachea kuttumbachea vangddeanche hal koxe zatat? Tem sogllem tea tiatrachea dusrea bagant polleonk mellta.

Ek tiatrist koso, kitlech tiatr boroun ani sador korun, dusreank soglle torecho adar diun, xevottak apunnuch koso fottovlo tem Samuel Carvalho aple eke attvech toreche bhumikentlean tea tiatrant bhes bore toren dakholl korta.

Komedi vixim, Michael ani Marcus eka-mekak sangat diun, lokak bhorpur hansoitat. Toxench, kantaram vixim, Aniceto-chem 'Bhogsonnem', Sonia-chem 'Jivit', Anicet/Succor de Santa Cruz-anchem 'Salam Purtugez serkarak', Xavier Almeida-achem 'Nirmilelem Dista', Chitra/Meena/Synetra-anchem 'Tegi Bhoinnieo' ani Cybil-achem 'Tin Vostu' aikopa sarkhim aslim ani boro sondex ditalim.


DIGDORSPI ULOITA: Samuel Carvalho
-1984 vorsa Patrick Dourado-chea 'Noketr' tiatrant poilech pavtt machier choddlom.
-1997 vorsa thaun svotache tiatr borounk survat keli. 'Hem Tumkam Soglleank' zaun asa mhozo poiloch tiatr.
-Az meren hanven sat tiatr machier dakhoileat. Mhaka tiatracho bhorpur mog ani somajik vixoy gheun, monant ievzota tem hanv boroitam ani machier sador kortam.
-Mhoje tiatr machier dakhounk vetana, 'stage setting'-acher hanv chodd bhor ghaltam.
-Mhojea tiatrant lokak sogllench mellchem, oxem chintun hanv zaiteam kolakarank gheun, mhozo tiatr dakhounk proitn kortam. He khepek mhojea tiatrant 18 kolakar asat.


P AGXEKAR
www.v-ixtt.com