Friday, October 2, 2009

Adeus Hermegildo

Adeus Hermegildo
● Tomazinho Cardozo

Konknni tiatr palkacher kallokh poddlo. Konknni sonvsar dukhant xevttolo. Konknni palkachem anik ek noketr – Hermegildo Camilo – zaka akho sonvsar H. Britton mhunn vollkotale, Setembrache ver hea sonvsarak ontorlo. Aitaradis Setembrache 27ver Penha de Franca, Britona hangasor tacho inter zalo. Konknni tiatr palkacho anik ek avesor somplo mhunttlear fott zanvchina.

'Boro kantorist'
H. Britton ek boreantlo boro kantorist zaun ghelo. Tannim hozaramni kantaram gaileant. To boro kantorist also tantun matui dubhav na punn to ek boro kantaram ghoddpi ‘lyricist’ - ui aslo. Tanchea kantaramni Goychea somazantlea poristhitinchem chitr astalem ani tantuntleanuch to tiatr pollennarank khuxal dovrunk vavuirtalo. Aiz poriant tachim sabar kantaram All India Radio ani dusrea madheantleant vitraitat.
‘Bandra Fest’, ‘Pandu Lapiao’, ‘Marialina’, adi tachim gitam amche sonskrutayecho bhag zala mhunntlear lottkem zanvchena. Hi kantaram H.
Brittonak amche modhem ani fuddle pillge modhem sasnnak jivo dovortolim.

'Ostoreche bhumikent'
Ostoreche bhumikent tachem kovtuk korta titleim toddem. To ostorechea rupan magir tem tornattem cheddum zaum, vo ‘fashionable lady’ zaum vo ostorechi kosli-i bhumika zaum, tiatr pollennaranchim kallzam jikon ghetalo. Dadlo ason poriant tachea hangant ostoreche ghunn, zoxe porim cholop, moddop, dolle bittbittavop, mukhamollar bhavnam haddop, nhesop, adi, thoknnai kori sarke asle. Taka polloilear to jivi ostorich koso distalo. Hem tachem khaxeleponn aslem. Ostori nheson kantaram gavpant taka lagtolo anik tiatrist zaunk na. Tech porim fattlea kallar jednam chedvam-bailo machier yeunk fattim sortaleo ten’na, mhunttlear 40/50 vorsam adhim, H. Britton-an ostorechi bhumika
(acting) korun tiatr jivo dovorpak motto adhar dilo.

'Bold and beautiful'
Tannem mhojea panch vo sov tiatramni kantaram gaileant. Mhaka ugddas asa, 1992 vorsa, amcho tiatr “Ami Soglle Ek” sorkarachea Information Department –an akhem Goy bhor dakhovpak nirnnoi ghetlo. H. Britton ani M. Boyer hea tiatrant kantaram gaitale. ‘ Bold and Beautiful’ hem H.
Britton-an ghoddlolem ‘Duet’ M. Boyer ani H. Britton gaitalo. Hea ‘duet’-achim utram vinodi (comic) aslinch punn H. Britton-chem ‘Bold and Beautiful’ cheddvachem sovong ani M. Boyer-achim ‘reactions’ tiatr pollennarank hansoun hansoun roddoitalim. 2002 vorsa “Goa Going Gone?”
ho mhojo tiatr Bangalore-ant dakhovpak Karnataka Goan Association hannim vinonti keli. H. Britton amche borobor Bangalore-k ghelo. H.
Britton-chem poilem git zalea uprant tiatrant H. Britton asa mhunn lokak koll’llem. To lok taka tachim ‘Bandra Fest’, ‘Pandu Lapiao’, adi., kantaram aikon vollkotalo. Tea disa toch H. Britton tanche somor ubo aslo. Hajir aslolea Bangalore-antlea Goykaramni ‘Pandu Lapiao’
Bandra Fest’ him kantaram mhunnpak vinonti keli. H. Britton-an tim kantaram gavun tanchi as bhagoili. Tachea kantaram vorvim H. Britton Konknni mogianchea kallzamni jiyetalo mhunn sid’dh zalem.

'Boro monis'
H. Britton boro kolakoruch naslo punn to ek boro monisui aslo. Zoso machier to tiatr pollennarank hansoitalo tosoch to heram kolakoram borobort astana tanchim fokannam korun soglleak khuxal dovortalo.
Jen’na to amchea Kala Mogi pongddachea tiatrant bhag ghetalo, to soglleam von zantto kolakor aslo. Amche tornne kolakor taka respeit ani man ditale. Punn H. Britton zanttera modem zantto zaun anbi bhurgeam modhem bhurgo zaun soglleancho vell hanson ani khellon sarunk adhar ditalo.

'Niyall'
Tachea mornnan tiatr palkak vhodd luskonn zalam. Tachea mornnan rikami zalolo zago bhorun haddpak khub kottin asa. Punn tachi dekh gheun amche aiche tiatrist palkachi udorgot korunk pott’tiddken panvoll martole mhunn ast ballgitam. H. Britton-ache familik bhuzvonn ditam ani tachea othmeak sasnnik jivit anvddetam. H. Britton Tiatr palkacho “Bold and Beautiful” kolakor zaun ghelo hantun matui dubhav na.


(As forwarded to goa-world.com by the writer on 3/10/2009)

Meet to condole H. Britton’s death

Tiatr Academy Goa
Panjim, Goa


Press Note for favour of publication


Meet to condole H. Britton’s death

H. Britton, a popular tiatr artiste, singer and composer expired recently in Britona Goa. Tiatr Academy Goa has organized a meeting on Sunday, 4th October 2009 at 5.00 p.m at Goa Chamber of Commerce Hall, near Azad Maidan, Panjim to condole the death of late H. Britton.
Tiatr artistes and well wishers of H. Britton are requested to attend the meeting and pay homage to the departed soul.




Tomazinho Cardozo
President
Tiatr Academy Goa
3/10/2009

(As forwarded to goa-world.com
Picture courtesy www.goa-world.com)

Followers

Blog Archive

About Me

My photo
A big e-welcome to you. Tumcam Maie-mogacho ieukar. Enjoy Life - This is not a rehearsal! Konkani uloi, boroi, vach ani samball - sodankal. Hich Goenchi osmitai ani amchem khalxelponn. Goenchi amchi Konkani bhas! Ekvottachem saddon Goenkaranchem. This is Gaspar Almeida from Parra, Bardez, Goa, based in Kuwait and am connected with the www.goa-world.com website created by Ulysses Menezes, and as Moderator of the famous first of its kind Gulf-Goans e-Newsletter (since 1994) and The Goan Forum and several Goan and Indian associations and forums and e-forums in Goa, India, Kuwait, The Middle East and worldwide.