Wednesday, July 7, 2010

::Tiatr Review :: 'Chol-ia London'

::Tiatr Review :: 'Chol-ia London'


Goُychem daiz sambhallunk ulo marta

Poromporik ani purvozanchea vevsaiyancher visor ghalun, il'le subez poixe melltat mhonn Goykar pordesant, odhik korun London-ak dhanv martat. Pordesant dhanv marli mhonn kaim vaitt na. Thoimsor il’lez subez poixe komaile mhonn koslich horkot na. Punn zaite amche Goykar Goyant aplem aslem-naslem dusreank vikhun, thoinch pennem korunk ievjitat. Fuddarak hem oxench chol'lem zalear, Goyant Goykaranchem mhonnonk kainch ek urchem na ani Goykarponn holu-holu somptolem mhonn Roseferns aplea 'Chol-ia London' hea tiatrant spoxtt korta. Oxikxit Anton (Roseferns) ani tacho xiklolo bhav Marian (Peter) sangatan jietat khore, punn aplo ekttoch put Nikhil (Victor) London-ak asa, hem chintun, Marian-ui London-ak vochpachim sopnam sopneta. Punn Anton-ik toslem mon na. Tachem kalliz-mon Goyant rombhlolem asa ani Goyantuch ravun, aplo ghor-sonvsar korunk to chinta. Aple ghorkarn' Isabel (Roshan) ani put Aaron (Ulhas Tari) sangata jieon, to aplem purvozanchem xet umedhin roita.
Aplo bapui London-ak ek dhondekar dekhun ani apunn unchlea kuttumbantlem mhonn somzun, Aaron-achi potinn Aisha (Antonette) gorvan bhonvta ani aplea sasupaik-sasamaink man diunk visorta. Tanche modhem zaitech pavtt hanga-thoim ttanv-ttinv zata.

London-ak vochun, aplea puta sangata thoinch pennem korpache bobke martana, aplea bhava Antonachea hatantlean sogllem bhatt-bhens apleachem korunk ani tea uprant tem vikhunk Marian bharim vavurta.

Chintlolim sopnam purim zainant tim polleon, aplea putacho adar gheun, Marian aplea bhavak eka fasak sampddaita ani akantvaddeank sangat dita mhonn tacher ek boglantt ghalun, Anton bonddkonnint poddta. Oxem zal'lem astona, atam purvozanchem bhatt, xet apleachem zatolem mhonn somzun Marian sontosta. Punn boltench ghoddta.
Sot uzvaddak haddunk ani nit melloun gheunk Isabel aplea putacho adar gheta, punn to aple potinni sangata bhonvddek gel'lo aslolean, Aisha-k lagon, Antonik bhorpur sonschem poddta.

Sampoddlolo opradhi boltoch mhonn kolltoch, Anton-ik xevottak suttka favo zata. Dusre vatten, aplea avoik okman korta dekhun, Aaron ragan Aisha-cher ek thapott fuloita. Tea ragan, mobail-ar Aisha aplea bapaik sogllem kolloita ani tabortob taka Goy apoita.

Goy ietoch, Aisha-cho bapui aple dhuvek koxe porim vaddoilem ani Anton-in apleak koso adar kelo, tem sangta. Tea uprant, to Marian-ak tachea puta vixim zaitench kolloita. Aplo put Nikhil, konnank na kolltam, London-ak logn' zalo ani taka ek put asa mhonn aikhun, Marian dukhi zata. Taka atak ieta ani tachem moronn mirmireanchem zata. London-ak vochpachim Marian-achim sopnam sopnanch urtat.

Kantaram vixim, Peter/Roshan-anchem 'Tiatrist', Tony de Ribandar-achem 'Sogllech Patki', Ulhas Tari-chem 'Sotavnni', Roseferns-achem 'Mosteponnam' ani Victor/Tony/Ulhas Tari-anchem 'Goyche Pulis' aikopa sarkhim aslim ani boro sondex ditalim. Vinodhi bhumikent, Brian ani Sally eka-mekak sangat diun, lokak bhorpur hansoitat. Goykaram modhem zagrutai vaddunk Roseferns-an anink osle tiatr machier haddche.

P AGXEKAR
www.v-ixtt.com

No comments:

Post a Comment

Followers

Blog Archive

About Me

My photo
A big e-welcome to you. Tumcam Maie-mogacho ieukar. Enjoy Life - This is not a rehearsal! Konkani uloi, boroi, vach ani samball - sodankal. Hich Goenchi osmitai ani amchem khalxelponn. Goenchi amchi Konkani bhas! Ekvottachem saddon Goenkaranchem. This is Gaspar Almeida from Parra, Bardez, Goa, based in Kuwait and am connected with the www.goa-world.com website created by Ulysses Menezes, and as Moderator of the famous first of its kind Gulf-Goans e-Newsletter (since 1994) and The Goan Forum and several Goan and Indian associations and forums and e-forums in Goa, India, Kuwait, The Middle East and worldwide.