khasgi jivitacher nodor marunk apoita
Ek monis tore-torecheo chuki kaddun, sobhemazar dusreank kikont korunk proitn kortana, toch monis teach chiklant ani toslech poristhitint asunk xeokta mhonn tannem visrunk favo na, oxem Mario Menezes aplea 'Fattlean Poi' tiatrant xiddkaita.
Aplo dhaktto bhav Daryl (Victor) ek tarvotti zaun, eka asromantlea onath cheddva Riza-chea mogan asa mhonn David (Mario de Vasco), ek pulis inspektor nosaiyen bhorta. Tem ek fulgoddem mhonn tacher gharannem ghalun, tachi vatt soddunk to aplea bhavak suchoita.
Ponn Rizacho apnnem niz mog kela mhonn Daryl aplea bhavak spoxtt korta ani aplim ghorchim aplea moga add aslear-ui, apunn Rizak kosoch soddchona mhonn sangta.
Logn uprant zorui Daryl-acho bapui Daniel (Mario Menezes) gharant sun ailea mhonn sontosta, toruiastona tachi avoi Jenetra (Rosy Alvares) Riza-k vaitt nodren polleta. Ani Daryl tarvar vetoch, eka gundda Travasso (Lawry Travasso) udexim aple sunek jivexim marunk fuddem kaddta.
Ponn Riza-k marpacho proitn kortana, Travasso okosmat zokhmi zata ani Riza tacho jiv salvar korta. Kel'lea upkara khatir, Travasso aplem vankddem panvl fattim gheta. Aplo ek 'plan' na iesesvi zalo dekhun, Jenetra aple sunek gharant-uch naka zal'lo vaur diun, bhorpur sotaita.Titlea mhonnosor, agbott tufanak sampddun, Daryl sangata her soglle tarvotti ontorle mhonn fon ieta. Rizak lagon aplo put apleak na zalo mhonn sangun, sasumaim aple sunek ek 'ponvoth' mhonn somzota ani gharantlem bhair ghalunk khottpott korta.
Tea vellar, Jenetrachea patthlea jivitar nodor marun, nigttench kazar zal'lem tedna ticho ghorkar obsoegak sampddun koso somplo ani tiche hal lohu korunk apunn tiche lagim koso logn zalom, tem Daniel tika kolloita. Punn aplea-i jivitant toxench kitem ghoddlolem mhonn Jenetra sudhronk proitn korta kai? Na! Urfattem, Jenetra aplech nirnnoya pormonnem fuddem veta ani Rizak gharantlem bhair ghalta.
Tea vellar, Rizak konn pavta? Tem konnachea gharant asro gheta? Rizak ticho ghorkar porot mellta kai? Soglleam addmelleam modem tancho ekvott zata kai? Tem sogllem tiatrachea dusrea bhagant bhes bore toren polleonk mellta.
Komedi babtint, Balchao (Ben Evangelisto) Elema (Joana) ghov-bail koxim eka mekak sangat diun, lokak bhorpur hansoitat. Balchao Daryl ani David-acho titiv mhonnttoch, aple potinni sangata to Daniel-achea gharant pennem korta ani dispottim bhaji-pallo vikhun, aplo disvaddo zhoddtat. Rizak lagon gharant zatoleam kestanvank udexim
Balchao ani Elema-cher-ui kedna-i far ieta. Ponn tim dogam-i sogllem hanstea tonddan ghetat ani fokan’nam korun sogllem sobhoun vhortat.
Kantaram vixim, Ben Evangelisto ani Joana-anchem 'Poder', Agnes ani Mario de Vasco-chem 'Kazari Bhoinn', Lawry Travasso-chem 'Susti Zainakat', Mario Menezes-Mario de Vasco-Victor-anchem 'Kaide Kosle?' ani Joana-chem 'Khodd'dde Tiatrist' boro sondex ditalim.
P AGXEKAR
V-Ixtt.com
No comments:
Post a Comment