Adeus Tuka M. Boyer ● Tomazinho Cardozo

Adeus Tuka M. Boyer

● Tomazinho Cardozo



Goyche Tiatr machier bhov todde kolakor apli nixanni sasnnak soddun ghele ani team mhan kolakoram modlo vhoddantlo vhodd kolakar mhunttlear somplolo M. Boyer. Hea kolakoran aplea tiatram vorvim, aplea ‘acting’-a vorvim ani aplea kantaram vorvim tiatr pollennarancher jadu kelo mhunttlear fott zanvchina. M. Boyer tiatrant asop mhunttlear lokanchi urponz tiatrak gordhi kortali. Konnachoi tiatr to zaunk, vhodd kolakorancho vo lhan kolakorancho, M. Boyerachem tantun asnnem tiatr pollennarank vhoddun haddtalem ani tiatrachea direkttorak ghottai ditalem.



Ekuch Rosto

M. Boyer-a vixim zaitem boroum –ieta. Tachea zaitea borem-magpeamni tacher khub boroilam. Tachea vavrachi tust kelea. Tiatr machiek ani Konknni sonskrutayek tachem iogdan kitlem asa tacher uzvadd ghatla. Torui punn tache boroupache kolecher nodor martana “Ekuch Rosto” hea tiatracher visor ghalunk zaina. “Communal harmony” hea tiatracho vixoi aslo. Khoreponnim 1976 vorsa hanvem ek “Kallokh ani Uzvadd” mhunn Kala Akademy-che Tiatr spordhent teach vixoyacher mhunttlear Goyantlea don somazam bhitor – Hindu ani Kristavam bhitor – ekvott rakpachea prosongacher tiatr boroilo. Hea tiatrant Hindunche ‘roles’ Hindu kolakor kortale ani Kristavanche ‘roles’ Kristi kolakor kortale. Zaite puroskar hea tiatrak favo zale. Goybhor ho tiatr dakouncho mhunn zaiteamni mhaka agro kelo. Margao, Ponnje ani Mapxeam ho tiatr dakoilo punn favo toso lok hea tiatrak ailo na mhunn to tiatr anik fuddo ghelo na. Favo toso hea tiatrak lok zaina zaunk karann mhunttlear tantun tiatr-machievoile nanvlovkik tiatrist naslet. Punn rokddoch M. Boyer-acho “Ekuch Rosto” ho tiatr jahir zalo. Hea tiatrant Tiatr machievoile vhoddantle vhodd artist bhag ghetale. Ho tiatr itlo nanvlovkik zalo ki Goyant Hindu-Kristanvanchea ekvottachim bhavnam poroslim. M. Boyerachem ‘script’ ani ‘direction’ bhes borem, zalolem ani Hindu toxe Kristi kolakoramni hea tiatrant bhag ghetlolo. M. Boyer-an eka tiatra vorvim Goychea somazak ek boreantlo boro sondesh dilo.



Kanttech Kantte

1980 vorsa “Kanttech Kantte” hea Goychea rajki ghoddamoddincher adharlolea mhojea tiatrak zaitim poilim inmam favo zalim. Anik ek pavtt zaiteamni mhaka agro kelo ho tiatr Goy bhor dakhovpak karann hea tiatrant amcho sorkar koso cholta ani rajki girgirem koxem ghunvta tacher bariksannen uzvadd ghatlolo. “ Kallokh ani Uzvadd” hea tiatracho mhojo onnubhov koddu aslo dekhun fuddem vochonk bhirant distali. Mhojea sarkea ‘Amateur’ artistancho ho tiatr polloupak lok ietolo vo na dubhav aslo. Tea vellar zaitea tiatr mogiam-ni mhaka sanglem M. Boyerak don vo tin kantaram gaipak sang mhunn. Anik konn mhunnolagle M. Boyer-a borobor Jacinto Vaz-akui tujea tiatrant ghal mhunn. Hanvem toxench kelem. “Kanttech Kantte” hea mhojea tiatrak dusroch rong ailo. M. Boyer don kantaram mhunnttalo ani Jacinto Vaz-a borobor ek duo mhunnttalo. Ho “Kanttech Kantte” tiatr ami 7 pavtt Ponnjent ‘repeat’ korcho poddlo. Tech porim Margao, Mapusa, Vasco, Ponda ani dusreai ganvamni hea tiatrak gordhi zaunk lagli. M. Boyer-a lagim lokak vhoddun haddpacho ‘power’ aslo to mhaka tea vellar koll’llo.



Tiatrachim xembor vorsam

1992 vorsa Goychea sorkaran Kala Akademy torfen tiatrachim xembor vorsam monoilim. Mottea dobajian ho somorombh kelo. Hea dobajiak ek khas tiatr ani tiatristancho ‘programme’ machier haddunk nirnnoi ghetlo. Vasco-che Shri. Paresh Joshi ani mhaka hi kariavoll ghoddoun haddpak Kala Akademy-n zababdari dili. Hi kariavoll toddem ‘picturisation’ ani toddem ‘live acting’ korun machier haddpak ami tharailem. M. Boyer-a itlo tea vellar famad tiarist anik naslo mhunttlear fott zanvchina. Tea disa tachi machier ‘entry’ sarki ‘dramatic’ zaupak zai asli oxem amkam dislem. M. Boyerachem ‘shooting’ korchea khatir ami Camera ani Cameraman gheun Santimoll, Raia M. Boyer-ager pavle. Amchi ievzonn ami Boyer-ak sangli. Rokddich M. Boyeran ek suchna dili. To mhunno laglo, tumi ieyat, aplea ghorachea darar marat, ‘Boyer Boyer’ mhunnon vhoddleant ulo korat ani apunn uprant aplea ghora kuxik aslolea eka maddar vhoir thavn ‘are konn thoim, kitem zalam? Konnak sodhtat?” adi.. oxe prosn hanv tumkam vhoir maddar thavn kortam. Amkam iezonn bori lagli. M. Boyer vhoir maddar choddlo. Sarko addsoram ani nal’l asa thoim ghelo. Chintlolea porim ami amchem ‘acting’ kelem – mhunttlear tachea ghorachea darar thokttokailem, vhodd-vhoddlean ‘Boyer Boyer’ mhunnon ulo marlo ani Boyeran vhoir maddar ravon amkam zabab dilo. Ami sokol ani Boyer vhoir maddar. Ami taka sanglem are Tiatrachea xembor vorsanchi somorombhnni asa ani tum ieinai? Tanne zabab dilo, “Are mhaka ugddasuch na mure. Rav ham? Hanv donuch addsoddam kaddtam ani Ponnje te kariavollik ietam. Itlench ‘shooting’ kelem.



Xembor vorsanche dobajiache kariavollik poilem tem ‘clipping’ podd’dear dakoilem ani teach khinnak Boyer zo aple ghora lagim maddar vhoir addsoram kaddtalo to tich nhesonn nheson ani hatan don addsoram gheun Ponnje Kala Akademiche machier bhitor sorlo. Lokanchea hanxeancho khollkholl ani talliancho ghonnghonn zalo.



Xevottak

Hanvem anik jem kitem Boyer-a vixim polloilam tem mhunttlear ami amcho tiatr machier dakoitana ami kitem kitem kortanv mhunttlear ‘background music’, ‘light effects’, ‘prompting’ nastana bhurge machier aplem kam’ korta hacher to apli barik nodor martalo ani amnkam xebaski ditalo. Borem aslear tachi thoknnai korunk to fattim ravonaslo



Oxe anik zaitea zannam lagim Boyer-a vixinche onnubhov astole. He soglle onnubhov ekttaim korpachi goroz asa ani fuddle pillgek samballun dovorpachi taktichi goroz asa.

Khorench M. Boyer, Tiatr palkacho jadugar – Goykaranchea kallzamni sasnnak jivo urtolo mhunn mhaka khatri asa. Tache familik buzvonn ani tachea othmeank sasnnik xanti magtam.





[Ho lekh V. Ixtt-ar porgott zala www.v-ixtt.com ]



Links: http://ishare.rediff.com/video/travel/padmashree-m-boyer-last-respect/627402


TIATR ACADEMY OF GOA
http://tiatracademy.blogspot.com/
{This blog carries varied news clippings from Day 1 of the conception of the Tiatr Academy establishment idea, and mantained by gaspar almeida for www.goa-world.com and Gulf-Goans e-Newsletter. Those wishing to add or contribute articles, pictures in any language are welcome to forward the same to gasperalmeida@gmail.com - Ulysses Menezes]

http://www.yahoogroups.com/group/gulf-goans/
http://www.goa-world.com/goa/tiatr/