Friday, July 17, 2009

Tiatr ‘Ek Dhago Sukhacho’ - Anil-Olga


‘Ek Dhago Sukhacho’ dukhi jinnecher lokx oddta

Mon’xache jinnent dukh yeta tednam tem dukh duserancher thapun, ek sukhi jinn jiyeunk monis proyotn korta. Oxea vellar tache vatter kanttech-kantte yetat ani sot kednam tori uzvaddak yetach mhonn Anil-Olga 'Ek Dhago Sukhacho' hea tiatrant dakoll korta.
Mogan poddun, folgam marun, ankvarponnar eka bhurgeak zolmank ailem dekun, somazant aplem pap lipounk ani ek sukhi jinn jiyeonk Tanya (Olga) aplea bhurgeak rostea degek soddunk sodta. Punn toxem korta astana, Sonia (Aplon) thoimsor pavta ani tache osle eke ostorek toslem kortub sobona mhonn taka sangta. Sonia-i ek ostori mhonntoch aplea bhurgeacho samball takach kor mhonn sangun Tanya aplea bhurgeak Soniache suvadin korta ani thoinchem koddsorta. Tanya atam Denzila (Anil) thaim kazar zavn ek sukhi jinn jiyeonk proyotn korta. Ankvarponnim adarlolem pap sasnnak lipun urtolem ani sot aplea ghorkara ani somazache nodre mukhar kednach ubem zavchem na mhonn Tanya somzota. Aplea puta udexim apleak ek bhangarachi sun favo zali mhonn sasupai (Alcin de Morjim) khup sontosta. Apleo don itsa pureo korunk zai mhonn sasupai suniek sangta. Poili aple dhuvek veginuch kazar korpachi ani dusri apunn morche poilim tinnem ek nat vo natu zolma haddpachi. Punn bhurgeachi khobor kaddtanch Tanyacher akant yeta. Taka ankvarponnicho ugddas yeta ani tem niraxi zata. Fuddem bhurgem zolmak haddpachi taka bilkul khuxi asona. Dusre vatten, aplem xikop purem korun, Sonia ghara portota, punn ghara yetana aplea sangata eka supurlea bhurgeak ghevn yeta. Sonia-ak pollevn Tanya ghaborta ani kitem korchem tem taka somzona. Gharant haddlolem bhurgem apleachem nhoi, punn konn eke ostoren taka rostea degek soddunk proyotn kel'lo mhonn Sonia aplea bapaik ani bhavak sangta. Sonia sangta tem fott ani tachea hatant aslolem bhurgem tachench zavnk zai mhonn Tanya tacher gharannem ghalta. Aplea rogtachea bhurgeak kitlem-i pois kelem zalear-ui, tem aple avoyxim pavtach mhonn Tanya Soniak sangta. Ankvarponnich bhurgeak ghevn bhonvta ani somaz kitem mhonntolo hem chintun Denzil aple bhoinnik gharantli bhair ghalta. Punn pai aple dhuveche sudik vetana, aste-aste sot uzvaddak yeta. Aplea bapaik visvasant ghevn, Sonia tea bhurgea vixim taka sogllem sangta. Punn toslea vellar, Denzil ghuspagondollak sampoddta. Konn sot ani konn fott uloita, tem taka somzona. Xevottak jivitant konn harovta ani konn jikhta, konnak sukh ani konnak dukh mellta, tem nimannea pordeant dakoll zata. Komedi babtint, Pulis Inspektor (Luis Bachchan) aplea sangateank ghevn boro rong haddta, lokak umedir dovorta. Alcin de Morjim-chem 'Devachem Ghor,' Ben Evangelisto-chem 'Soirik,' Marcelin de Betim-chem 'Obsoeg,' Olga-chem 'Amerikan Green Card,' Rozario de Benaulim-chim '108 Service' ani 'Tiatrist,' Marcelin de Betim ani Junior Chico-chem 'Dorji' kantaram aikopa sarkim aslim ani boro sondex ditalim. 'V Ixtt' Anil-Olgak porbim dita ani tanchea tiatram udexim Konknni machi voir sorunk ani girest zavnk magta.

P Agxekar

DIGDORSPI ULOITAT: Anil-Olga
-Konknni machier ho amcho novo (9th) tiatr.
- Somajik, rajki vixoy monant ghevn, amche tiatr ami sangatan sador kortanv.
- Jinnent dukh yeta tednam, tem dukh Dev dhaddina, punn mon’xache chukik lagon dukh, pidda yeta. Devan amkam jivit dilam zalear, To dukh kiteak dhaddtolo? hem sot uzvaddak haddunk amchea hea tiatrant ami proyotn kela.
- Thoddo lok fokot 'sasumaim-sun' ani 'sun-sasumaim' vixoyacher tiatr pollevnk sodta. Tiatr pollevpeamni tiatrant haddloleo noveo yeuzonno (ideas) mandun ghevnk goroz asa. Tednach Konknni machiecho dorzo voir sortolo.

Lapitt
WWW.V-IXTT.COM

http://www.goa-world.com/GOA/music/live.htm

No comments:

Post a Comment

Followers

Blog Archive

About Me

My photo
A big e-welcome to you. Tumcam Maie-mogacho ieukar. Enjoy Life - This is not a rehearsal! Konkani uloi, boroi, vach ani samball - sodankal. Hich Goenchi osmitai ani amchem khalxelponn. Goenchi amchi Konkani bhas! Ekvottachem saddon Goenkaranchem. This is Gaspar Almeida from Parra, Bardez, Goa, based in Kuwait and am connected with the www.goa-world.com website created by Ulysses Menezes, and as Moderator of the famous first of its kind Gulf-Goans e-Newsletter (since 1994) and The Goan Forum and several Goan and Indian associations and forums and e-forums in Goa, India, Kuwait, The Middle East and worldwide.