'Faleam Udetelem?' Dusreank borem korunk ulo marta
Mon’xan borem korchem asa tem aizuch korunk zai, kitem-i borem ulovchem asa tem aizuch ulovpak zai, karonn faleancho dis konnench pollevnk na mhonn Pascoal Rodrigues 'Faleam Udetelem?' hea aplea khell-tiatrant sangunk sodta.
'Faleam Udetelem?' ho khell-tiatr akromonn zal'lea Mumbointlea Taj hotel-acher attaplolo asa.
Purpurasao (Jane) ani ticho poti, Pilat (Seby) 'shopping'-ak bhair sorlolim astana, okosmat akantvadi yeun Taj hotel-acher akromonn kortat. Tea vellar tanchi ekttich dhuv Swizel (Mita) tea hotelachea eka kuddant asli. Tea zoddpeacher akant ailolo pollevn, thoimsor aslolo Braz (Jaju) ani tachi potinn Clara (Francisca) tankam sogllo adar divpak fuddem sortat. Cheddvak vattavpak gel'le kodden uzo Brazache fattik lagta ani taka adar kortana, toch uzo Clarachea tonddar poddun, tichea polear ek mau urta. Sovi klas meren aplem xikop korun, Trevor (Pascoal) iskol soddta. Dusreanchea adarak pavunk to sodanch toyar asta. Ixtta Kevin-ak (Neville) menijerachi nokri mellovn ghevpak poixeanchi goroz poddta tednam Trevor-uch tachea adarak pavta. Goroz titleank-ui to adar korta. Osoch ek dis Swizel-ak adar korunk gel'le kodden, to tachea mogant poddta. Punn Swizel Kevinacho mog korta mhonn kolltoch, Trevor aplea ixttak sohokar bhasaita. Swizelacho ekvott aplea puta Kevina thaim zal'lo pollevn, Braz ani Clara khup sontostat, punn gharant ailoli sun soglleam modem futt ghalunk proyotn korta. Aplo zanvoim eke komponicho menijer dekhun, Mumboi aplem thikann soddun, Purpurasao ani Pilat aplea ak’khea kuttumbak Gõyam haddun, Kevinager pennem kortat. Kevin aple bailechem aikun, aplea avoy-bapaik kikont korta. Tanchea koxttancho vavr dusream mukhar svikarunk to visorta.. Apli avoy piddent astona-i, aple sasumaink ani sasupaik bhonvddek vhorunk to fattim sorona. Kevinachim avoy-bapui aplinch mhonn somzun, pordesant gel'lo astana, Trevor tankam duddvanchi mozot korta. Punn 'courier' korun tankam dhaddole soglle poixe Swizel guptim apnnachea tabeant korta. Ek dis, aple potinnichem aikun, Kevin aplea avoy-bapaik gharantlim bhair ghalta. Ghor toxench bhatt-bhens aplea dhakttea putachea nanvar korunk, Swizelachea kusveantlea bhurgeacho bhosm’ korunk tachich avoy panvlam marta. Ani dotorachea adaran gorbhpatt korun gheta. Koslea tori bhan’goddeank lagon, komponiche odhikari Kevinak atam nokrevelo nikllaitat. Dusre vatten, rostear poddlolim Braz ani Clara Trevor-achea adaran pordesant pavtat ani ek sukhi jinn jiyetat. Somazachi loz vattaunk, ghorachim kagdam ghannant dovrun, komponik zal'lem luksonn bhorun kaddunk Kevin proyotn korta. Punn tench ghor pavnnek poddun, Trevorachea adaran Braz ani Clara tem porot viktem gheta. Xevottak konn zoitivont zata ani konn harovta tem nimannea pordear bes-bore toren dakoll zata. Komedi babtint, Government (Rumualdo) ani Private (Jr Simla) eka-mekachea adaran, tore-torecheo bhumika korun lokak umedir dovortat. 'V.Ixtt' Pascoal ani tachea pongddak porbim dita ani fuddarak Konknni machier taka borem yes anvddeta.
Digdorspi Uloita: Pascoal Rodrigues
- Ho mhozo 46vo khell- tiatr.
- Somajik vixoy ghevn, hanv tiatr boroitam ani machier dakoun, loka modem zagrutai vaddoitam.
- Mhojea kirkoll vavra udexim dor ek ghorabo boro zavpak mhoje anvdde.
- Somazant kedo-i vhoddlo monis zaum, dor eka puta-dhuven aplea avoy-bapaiche koxtt-tras kednach visrunk favona.
P Agxekar
WWW.V-IXTT.COM
Lapitt
http://www.goa-world.com/GOA/music/live.htm
http://mail.google.com/mail/?ui=2&ik=94c9860c84&view=audio&msgs=122a62a05bb08ceb&attid=0.1&zw
No comments:
Post a Comment