Amche tiatrist aple tiatr Romi Konknnin boroitat. Choddxe zannank goddiek Konknnintlean mullavem xikxonn mellunk na. Ponn goddiek Romi Konknnintlim disallim,satollim, mhoinnealim, masikam ani pustokam vachun amche tiatristamnim Konknni xikun tiatr boroile. Adim tem sobtalem.
Atam xikxonn vaddlam ani xiklole tiatrist adlech porim boroitat tem polleun vichitr dista. Tanchea tiatrachea nanvantuch poili chuk asta. Atam nennarponnacho kall urunk nam. Az Konknni borounk kitlim sompe-ponnam asat. Kitlinch pustokam asat. Amkam kosli-i oddchonn aslear Konknniche zannkar asat tancho adar magum yeta. Dor disa thoddim tori Konknni utram ani tancho orth xikun borpavoll sudarum yeta. Romi Konknni nove pod'dotin boroun tiatranchi borpavoll unchlea dorjear pavchi, hech Gõyche Tiatr Akademiche anvdde. Tannim Somaradis, Junache 7ver Ponnje TAG-achea 'Conference Hall-ant' Konknni sarke ritin borounk proyotn korum-ia' nanvachem xibir ghoddun haddlem.
Zaitea zannamni tantunt vantto ghetlo tem polleun khuxalkay bhogli. Hem xibir TAG hachea odheokx Xri Tomazinho Cardozan choloilem. Konknni borounk vo sudarunk sodtat, tannim chukoinastana oslea xibiramnim vantto ghetlear chodd borem.
Vavrak rojea pasun ghalun, oslea xibirak ailear ghoddiek faideachem zaunk xokta. Sogllea tiatristamnim ani Konknni xikunk sodtoleamnim Romi lipint Konknni borounk xikchem. Tiatranchi borpavoll sudraunk chodd goroz asa.
PRI NEVEL L.S. GRACIAS,
PONNJE
www.v-ixtt.com
No comments:
Post a Comment