AMCHOCH DHORM KITEAK HALTA?

AMCHOCH DHORM KITEAK HALTA?

Magnneacher bhor ghalta Povitr Pustokantlean Devachea Utracher toxench Tersachea magnneacher amchem jivit manddavollir ghalunk ami proitn korinanv tednam, dor eka Kristi mon’xachea jivitant kitem ghoddta tem 'Amchoch dhorm' kiteak halta?' he dharmik dakhovnnent polleunk mellta.

Jaydon (Franky Gonsalves) aplea avoicho (Betty Alvares) ani bapaicho (Jacinto) ekloch put. Aplea avoi-bapai koddlean taka sogllench mellta dekhun, to apleak zai te porim aplem jivit jiyeunk sodta. Tachem ghor igorje kuxikuch aslolean, ghantticho avaz porot-porot aikun to bejear zata ani taka bhirmiri marta. Tea kuttumbant sogllem asa khorem, punn magnneak zago asona. Jaydon-acho avoi-bapui apleach vavra-dhondeant gull zal'lim astat.

Dusre vatten, xezarchea ganvant Aslanta (Buskha) aplea bapai (Justin) ani bhava Mashwin (Simon Gonsalves) hanchea sangata jiyeta. Tem Jaydon-acho gupit mog korta ani ti khobor aplea bapaik kolloitoch, tache vixim odik mahiti gheunk, Aslanta-cho bapui Jaydon-achea ganvak bhett dita. Thoimsor to Gurudas (Ignatius de Xelvon) nanvachea ek zanttea mon’xak bhett dita ani Jaydon ani tachea avoi-bapai vixim soglli mahiti gheta. Karmelinachea mogan astona, Jaydon-achea bapain tachi moriad koxi ibaddli ani tannem aplo jiv koso sompoilo, tacho ugddas Gurudas korta. Bim toxem bhat, bapui toso put, oxem sangun, Jaydon-ui aplea bapai sarkho zala mhonn Gurudas sangta ani Aslanta-k lognant diunche poilim don pavtt chintunk to tea vattsurea thaim magta. Karmelinachi moriad ibaddli tedna, Jaydon-achi avoi gorbest asli, punn aplea ghovachi khobor aikotoch, ti gorbpat korta mhonn Gurudas 'family deed'-a udexim tea vattsureak fuddem kolloita.

Mashwin aple hoklechem aikun, Saibinnicher visor ghalta ani gharant Saibinnichi imaj haddta tea disa, to mud'dom aple hokleger vochun ravta. Punn bottir gel'lo astona, tachea monar uzvadd poddta ani to bodolta. Tachea sangata, tache hoklechea monar-ui uzvadd poddta. Mashwin-achi dekh gheun, Jaydon ani tachea avoi-bapaik-ui Deva-xim porot haddunk Aslanta-cho bapui taka sangta. Toxem kelearuch tachean Jaydon-a thaim logn' zaun yeta mhonn to aple dhuvek kolloita.

Aslanta Jaydon-achem mon bodlunk xeokta kai? Tachoch adar gheun, tachea avoi-bapaichi novsornni korunk tem iesesvi zata? Kuttumbant magnnem bhitor sortoch, Jaydon kitem onnbhovta? Tem sogllem te dakhovnnechea dusrea bhagant polleunk mellta.
Komedi babtint, Sally, Selvy ani Ambe eka-mekak sangat diun, lokak bhorpur hansoitat.
Kantaram vixim, Marcus Vaz-achem 'Angovnn', Xavier Gomes-achem 'Fottu', Ignatius de Xelvon-achem 'Xikop Naslolo', Bushka-chem 'Adim ani Atam', Marcus-Xavier-anchem 'Khore Kristanv' ani Simon-Xavier-Marcus-achem 'Tim Alma-nk boro ievkar mell'lo bori dekh ani xikvonn dita.

P Agxekar
V-Ixtt.com
http://www.v-ixtt.com/client/list.asp?id=16


As posted in GULF-GOANS e-NEWSLETTER (since 1994)
http://www.yahoogroups.com/group/gulf-goans/ http://www.goa-world.com
________________________________________