Piddek boli poddun, tornnech pirayer mon’xacher okosmat mornn ailear, tachea ghorcheank dukh bhogta. Jivim astona tanche khatir kainch ek korunk zaunk na dekhun, mornna uprant tanchea omor ugddasak somazant kitem-i korun, tosleank kallza-monant sodamkal jivim dovrunk proyotn zata mhonn Patrick Dourado 'Tujea Ugddasak' hea aplea tiatrant dakoll korta.
Pordesant astona, aplo sakramentacho ghorkar Clinton (Ulhas Tari) aplea sangata jiyetana, Mable (Dola) eka Keralachea M D Nayar (Ave)-chea mogant poddta. Gõyam yeupache vatter astona-i, Nayarak Gõyam haddunk Mable soglli bondabost korta.
Suela (Sonali) pordesant aslolea aplea bhava Clinton-achea mogak axeta, punn aple ghorkarnnichem aikun, to aple avoy Luciak (Antonette de Calangute) ani bhoinnik kenddta ani pois dovorta. Aple sasumainchem ghor pornnem dekhun, aplea ghorkarak aple muttient dovrun, Mable aplea ghorkara sangata aplea bapai (Mario de Vasco)-chea gharant pennem korta.
Tanchi ek dis bhett gheunk ailolim astona, Clinton pordesant thaun aple avoik dhaddlolea duddvancho hixeob magta. Aple sasumain borim nhesnnam ghalun, soglle duddu ogddaile mhonn Mable somzota, punn dhaddlole soglle duddu Suelache pidde fattlean moddle mhonn Lucia aplea putak sangta.
Dusre vatten, Mableak bhurgeam sovem koslich doya-maya na ani Sonalik sodanch kenddta dekhun, tanchea ekvottak ek-ui bhurgem na mhonn tacho bapui tachea tonddar marta. Aplea ghorkarak 'divorce' diun, aplea novea mogea thaim ekvott zoddpachim sopnam sopneun, Mable aplem sogllem bhangar ani duddu choryam Nayarak dita.
Mableak divors diun, aple avoik ani bhoinnik bhett diunk gel'lo astona, Suela-che 'blood cancer' pidde vixim Clintonak kollun yeta. Punn chodd uxir zal'lean, Suela aplea bhavachea hatant prann soddta.
Bhoinnichea omor ugddasak ani durbollanchi seva korchea monan, Clinton koslo nirnnoy gheta kai? Konn konnak fottoita ani xevottak konnacho ghat zata, tem tiatrachea dusrea bhagant bes bore toren dakoilam.
Komedi babtint, Emil (Joana)-a aplea sangata Sally, Richard ani Joaquimk gheun, lokak pottbhor hansoitat.
Kantaram vixim, Aniceto-chem 'Gõyche Khellgoddi,' Andrew-chem 'Nirdukai,' Joaquim Cabral-achem 'Borem Kor,' Ave-chem 'Devan Dhaddlam,' Marcus Vaz-achem 'Follam,' Aniceto-Andrew-Marcus-anchem 'Monis vo Sunnim' ani Mica-Sonali-Haswin-anchem 'Kochro' aikopa sarkim aslim ani boro sondex ditalim.
V.Ixtt Patrick Douradok porbim dita ani fuddarak anik-ui voznadik tiatr machier dakoun, Konknni machi odik girest korunk magta. Digdorspeachem Mon: Patrick Dourado -18 vorsanche pirayer hanvem tiatr borounk survat keli. Aiz meren hanvem 25 khell-tiatr ani 40 tiatr machier sador keleat. -'Nagovnnechi Girestkay' ho mhozo poiloch tiatr. -Kuttumbik vixoy monant golloun, mhoje tiatr boroitam. -Aiz choddxe nove tiatrist boroupi, digdorspi chukon zaleat.. Thodde duddvanchea nettar zaleat. Thoddeank hanvem rosto dakoila. -Adlea ani atanchea tiatr pollenaram modem ontor asa. Aiche tiatr pollevpi vegllech asat. Tankam novem kitem-i zai ani vangddach pozddem dakholear tankam avoddta ani toslem lok 'appreciate' korta.
P AGXEKAR
www.v-ixtt.com
No comments:
Post a Comment