Roseferns' tiatr 'THAPOTT'

'THAPOTT'

'THAPOTT' Ditoleak ani ghetoleak ek thapott boreak toxench vaittak-ui poddunk xokta mhonn Roseferns 'Thapott' hea aplea tiatrant dakoll korta.
Captian D'Souza (Rosferns)-acho put Frazer (Victor) eka gorib cheddva Fiona (Roshan)-acho guptim mog korta. Tacho bapui tanche ixttagoticher add astolo mhonn zanno zaun-ui, to aplea bhav Crizmon (Tari)-acho sogllo adar ani sohokar gheta.
Ek dis Fionachi chitt vachunk proyotn kortana, Crizmon aplea bapaik ani avoyk Terez Mari (Francisca)-ak sampoddta. Capt D'Souza aplo daktto put Crizmon Fionachea mogant asa mhonn somzun, tacher ek thapott marta ani gharantlo bhair ghala.
Dusre vatten, David (Ali) Sofia (Antonnette de Curtorim)-cho fottkiro mog korun, taka avoyponnachea bhesar soddun, pordesant veta. Somazant loz lipoun dovrunk, Sofia-cho bhav Freddy (Peter) zolmant ailolea aple bhoinnichea bhurgeak eka kochreachea dobeant uddoita. Tea vellar, Crizmon tea bhurgeak thoinchem ubarta ani tacho poramos korunk yeujita..


Fraxer Fiona-cher visor ghalun, Sofia thaim kazar zata ani aplo sonvsar korta. Fraxer-an apnnak fottoilem dekun, Fiona madr zaupachim sopnam sopneta. Tea vellar, Crizmon taka buzvonn diunk yeta ani ghoddlam tacho apunn guneanvkari mhonn vollkhun gheta. Punn madr zaupachem panvl fattim gheunk Crizmon tache lagim magta.
Put gharantlo bhair soron gelo mhonn Capt D'Souza-k khup khont bhogta. Ek dis aplea sangata tea supurlea bhurgeak gheun, aplea avoy-bapaichi bhett gheunk ailolo astana, aplo bhav Sofia thaim kazar zala to polleun, Crizmon ojap zata. Apunn-ui kazar zaun, eka bhurgeacho bapui zalam mhonn to soglleank sangta.
Punn tem bhurgem apnnachench mhonn Sofia ani tachea ghorkarak khobor asona. Dusre vatten, Ali Sofiak 'blackmail' korta ani tache koddlean zaitech duddu magta. Bapui hospitolant ilaz ghetana, taka rogtachi goroz poddta tednam Crizmon aplem rogot taka diunk fattim sorta. Akantachea vellar, Crizmon aplem rogot aplea bapaik kiteak dina?
Crizmona thaim aslolo bhurgo aploch mhonn Sofiak sid’dh zata kai? Bapaichea thapttak lagon, Crizmonachem fuddlem jivit koslem ani koxem zata? Hem sogllem tiatrachea dusrea bhagant bes bore toren dakoilolem asa.
Komedi babtint, inspektor Kando (Sally), Bikond (comedian Brian) ani Constancio ekamekak sangat diun, lokak borech umedhir dovortat. Kantaram babtint, Peter-Roshanachem duet 'Serkaracho novo kaido,' Lawry-Francis de Tuem-chem “Purtugezancher add,' Antonette ani Victor-achem 'Michael Jackson,' Francis de Tuem-chem 'Moronn chukona,' ani Lawry-chem 'Background polleuncho' aikopa sarkim aslim ani lokak boro sondex ditalim.



Digdorspeachem Mon:

'Thapott' hea tiatra vorvim 1980 vorsa
hanvem mhozo pongodd ghoddun haddlo.
Tednam hea tiatrache hanvem 205 proyog kele.
Otubrache 25ver toch 'non-stop' tiatr pustok
rupan hanv uzvaddak haddunk sodtam. Lovkik zal'lo mhozo tiatr pustok rupan
haddchem karonn itlench. Sahit’ya mollar mhozo ek-ui vavr na. Tiatr pustok rupan haddun, hanv fuddle pillgek kitem tori sabhallun dovrunk sodtam.
Fuddarak-ui lovkik zal'le mhoje tiatr pustok rupan haddunk mhozo proyotn astolo.

P AGXEKAR
V-Ixtt.com Upkararan