Photo Source: Daniel F. de Souza (Vasoc).
::Pollelam tem Boroilam ::
Adeus Hermegildo
Konknni tiatr palkacher kallok poddlo. Konknni sonvsar dukhant xevttlo. Konknni palkachem anik ek noketr - Hermegildo Camilo, zaka ak’kho sonvsar H. Britton mhunn vollkhotale, Setembrache 24ver hea sonvsarak ontorlo. Aitaradis Setembrache 27ver Penha de Franca, Brittona hangasor tacho inter zalo. Konknni tiatr palkacho anik ek avesvor somplo mhollear fott zauchina.
Boro kantorist
H. Britton ek boreantlo boro kantorist zaun gelo. Tannem hozaramni kantaram gaileant. To boro kantorist also tantum matui dubav na punn, punn to ek boro kantaram ghoddpi - ‘lyricist’ - ui aslo. Tachea kantaramni Gõy somazache poristhitichem chitr astalem ani tantuntleanuch to tiatr pollennarank khoxal dovrunk vavurtalo. Aiz porian tachim sabar kantaram ‘All India Radio’ ani dusrea madeomantlean vitraitat. ‘Bandra Fest’ ‘Pandu Lampianv’, ‘Marialina’, adi. tachim gitam amche sonvskrutayecho bhag zala mhonnlear lottkem zauchem na. Him kantaram H. Brittonak amche ani fuddle pillge modem sasnnak jivo dovortolim.
Ostoreche bhumikent
Ostoreche bhumikent tachem kovtuk korta titlem-i thoddem. To ostorechea rupan - magir tem tornnatem cheddum zaum, vo ‘fashionable lady’ zaum vo ostorechi kosli-i bhumika zaum, tiatr pollenaranchim kallzam jikhon ghetalo. Dadlo ason porian tachea angant ostoreche gunn, zoxe porim cholop, moddop, dolle bittbittavop, mukhamollar bhavnam haddop, nhesop, adi. tokhnnai kori sarke asle. Taka pollelear to khori ostorich koso distalo. Hem tachem khaxeleponn aslem. Ostori nheson kantaram gavpant taka lagtolo anik tiatrist zaunk na. Tech porim fattlea kallar jednam cheddvam-bailo machier yeunk fattim sortaleo tednam, mhonnche 40/50 vorsam adim, H. Britton-an ostorechi bhumika (acting) korun tiatr jivo dovorpak vhodd adar dilo.
‘Bold and beautiful’
Tannem mhojea panch vo sov tiatramni kantaram gaileant. Mhaka ugddas asa, 1992 vorsa, amcho tiatr “Ami Soglle Ek” sorkarachea ‘Information Department’ -an ak’khem Gõybhor dakovpak nirnnoy ghetlo. H. Britton ani M. Boyer hea tiatrant kantaram gaitale. ‘ ‘Bold and Beautiful’ hem H. Britton-an ghoddlolem ‘Duet’ M. Boyer ani H. Britton gaitalo. Hea ‘duet’-achim utram komik aslinch, punn H. Brittonachem ‘Bold and Beautiful’ cheddvachem sovong ani M. Boyer-achim ‘reaction’-am tiatr pollevpeank hansoun- hansoun roddoitalim. 2002 vorsa “Goa Going Gone?” ho mhozo tiatr Bangalore-ant dakounk Karnataka Goan Association-an vinoti keli. H. Britton amche borabor Bangalore-ak gelo. H. Brittonachem poilem git zalea uprant tiatrant H. Britton asa mhunn lokak koll’llem. To lok taka tachim ‘Bandra Fest’, ‘Pandu Lampianv’, adi., kantaram aikon vollkhotalo. Tea disa toch H. Britton tanche somor ubo aslo. Hajir aslolea Bangalore-antlea Gõykaramni ‘Pandu Lampianv’ Bandra Fest’ him kantaram gavpak vinoti keli. H. Britton-an tim kantaram gavun tanchi as bagoili. Tachea kantaram vorvim H. Britton Konknni mogianchea kallzamni jiyetalo mhunn sid’dh zalem.
Boro monis
H. Britton boro kolakaruch nhoi, punn to ek boro monis-ui aslo. Zoso machier to tiatr pollevpeank hansoitalo tosoch to heram kolakaram borabor astana tanchim fokannam korun soglleak khoxal dovortalo. To amchea Kala Mogi pongddachea tiatrant bhag ghetalo, to soglleam von zannto kolakar aslo. Amche tornne kolakor taka respeit ani man ditale. Punn H. Britton zannteam modem zannto zaun ani bhurgeam modem bhurgo zaun soglleancho vell hanson ani khellon sarunk adar ditalo.
Niyall
Tachea mornnan tiatr palkak vhodd luskonn zalam. Tachea mornnan rikamo zalolo zago bhorun haddpak khub kottin asa. Punn tachi dekh gheun amche aiche tiatrist palkachi udorgot korunk pott’tiddken panvol martole mhunn ast ballgitam. H. Britton-ache familik buzvonn ditam ani tachea otmeak sasnnik jivit anvddetam. H. Britton Tiatr palkacho “Bold and Beautiful” kolakar zaun gelo hantum matui dubav na.
TOMAZINHO CARDOZO
V.Ixtt.com
www.colaco.net www.v-ixtt.com
http://www.goa-world.com/goa/music/live.htm
Promoting Tiatr & Tiatrists since 1994
http://tiatracademy.blogspot.com/
Gulf-Goans e-Newsletter presented by goa-world.com team
http://www.yahoogroups.com/group/gulf-goans
http://aitaracheokaskuleo.blogspot.com/
GREET YOUR LOVED ONES IN GOA
http://www.goa-world.com/expressions/
Lapitt
http://aitaracheokaskuleo.blogspot.com/
No comments:
Post a Comment