“Adeus” Tuka M. BOYER

“Adeus” Tuka M. BOYER

Gõyche Tiatr machier bhov thodde kolakar apli nixanni sasnnak soddun gele ani tea mhan kolakaram modlo vhoddantlo vhodd kolakar mhonnlear somplolo M. Boyer. Hea kolakaran aplea tiatram,‘acting’-a ani kantaram vorvim tiatr pollennarancher jadu kelo. M. Boyer tiatrant asop mhonnlear lokanchi urponz tiatrak gordi kortali. Konnacho-i tiatr to zaum, vhodd vo lhan kolakarancho, M. Boyerachem tantum asnnem tiatr pollennarank oddun haddtalem ani tiatrachea direktorak ghottay ditalem.
Ekuch Rosto
M. Boyer-a vixim zaitem boroum yeta. Tachea zaitea borem magpeamni tacher khub boroilam, tachea vavrachi tust kelea, tiatr machiek ani Konknni sonvskrutayek tachemyogdan kitlem asa tacher uzvadd ghala. Torui tache borovpache kolecher nodor martana “Ekuch Rosto” hea tiatracher visor ghalunk zaina. “Communal harmony” hea tiatracho vixoy aslo. Khoreponnim 1976 vorsa hanvem ek “Kallokh ani Uzvadd” mhunn Kala Akademy-che Tiatr spordhent teach vixoyacher, mhonnlear Gõyantlea don somazam bhitor – Hindu ani Kristavam bhitor – ekvott rakhpachea prosongacher tiatr boroilo. Hea tiatrant Hindunche ‘roles’ Hindu kolakor kortale ani Kristavanche ‘role’ Kristi kolakor kortale. Zaite puroskar hea tiatrak favo zale. Gõybhor ho tiatr dakouncho mhunn zaiteamni mhaka agro kelo. Moddganv, Ponnje ani Mhapxeam ho tiatr dakoilo, punn favo toso lok hea tiatrak ailo na mhunn to tiatr fuddo vochunk na. Karonn tantum tiatr-machievoile nanvlovkik tiatrist nasle. Punn rokddoch M. Boyer-acho “Ekuch Rosto” ho tiatr jahir zalo. Hea tiatrant machievile vhoddantle vhodd artist bhag ghetale. Hea tiatran Gõyant Hindu-Kristanvanchea ekvottachim bhavnam posorlim. M. Boyerachi ‘script’ ani ‘direction’ bes-borem zalolem ani Hindu toxe Kristi kolakaramni hea tiatrant bhag ghetlolo.
Kanttech Kantte
1980 vorsa “Kanttech Kantte” hea, Gõychea rajki ghodda-moddincher adarlolea mhojea tiatrak zaitim poilim inmam favo zalim. Anik ek pavtt zaiteamni mhaka agro kelo ho tiatr Gõybhor dakovpak, karonn hea tiatrant amcho sorkar koso cholta ani rajki girgirem koxem ghunvta tacher bariksannen uzvadd ghalolo. “Kallokh ani Uzvadd” hea tiatracho mhozo onnubhov koddu aslo dekun fuddem vochonk bhirant distali. Mhojea sarkea Amateur artistancho ho tiatr pollevnk lok yetolo vo na dubav aslo. Tea vellar zaitea tiatr mogiamni M. Boyerak don vo tin kantaram gavpak sang mhunn sanglem. Anik konn mhonnonk lagle, M. Boyer-a vangdda Jacinto Vaz-akui tiatrant ghal. Hanvem toxench kelem. “Kanttech Kantte” hea mhojea tiatrak dusroch rong ailo. M. Boyer don kantaram mhonntalo ani Jacinto Vaz-a borabor ek duo mhonntalo. Ho “Kanttech Kantte” tiatr 9 pavtti Ponnje repeat korcho poddlo. Tech porim Moddganv, Mapusa, Vasco ani Ponda hangasor-ui hea tiatrak gordi zavnk lagli. M. Boyer-a lagim lokak oddun haddpacho power aslo to mhaka tea vellar koll’llo. Uprant Kala Akademichea spordheamni inamam jikhlole tiatr hanvem dusrea xaramni dakovnk proyotn kele tednam M. Boyer, Jacinto Vaz ani H. Britton hea kolakoramni mhaka adar dilo. Mhonnche tiatr pollennar tiatr kitlo-i boro asa mhonnlear te pollevnk ienant, punn tantum omkech tiatrist asat mhonnlear te tiatrak gordi kortat.
Tiatrachim xembor vorsam
1992 vorsa Gõychea Sorkaran Kala Akademiche torfen tiatrachim xembor vorsam monoilim. Mottea dobajean ho somarombh kelo. Hea dobajeak ek khas tiatr ani tiatristancho ‘programme’ machier haddunk nirnnoy ghetlo. Vascoche Xri Paresh Joshik ani mhaka hi karyavoll ghoddoun haddpak Kala Akademin zababdari dili. Hi karyavoll thoddem picturisation ani thoddem live acting korun machier haddpak ami tharailem. M. Boyer-a itlo tea vellar famad tiarist anik naslo mhonnlear fott zavchina. Tea disa tachi machier entry sarki dramatic zavpak zai asli oxem amkam dislem. M. Boyerachem shooting korchea khatir ami Kemra ani Cameraman ghevn Santemoll, Raia M. Boyer-ager pavle. Amchi yeuzonn ami Boyerak sangli. Rokddich M. Boyeran ek suchna dili. To mhonnonk laglo, tumi yeyat, aplea ghorachea darar marat, ‘Boyer Boyer’ mhonnon vhoddlean ulo korat ani apunn uprant aplea ghora kuxik aslolea eka maddar voir thavn ‘are konn thoim, kitem zalam? Konnak sodtat?” adi.. oxe prosn hanv tumkam voir maddar thavn kortam. Amkam yeuzonn bori lagli. M. Boyer voir maddar choddlo. Sarko nal’l asa thoim kovllant gelo. Chintlolea porim ami amchem acting’ kelem – mhonnche tachea ghorachem dar tokttokailem, vhoddlea-vhoddlean ‘Boyer Boyer’ mhonnon ulo marlo ani Boyeran voir maddar ravon amkam zabab dilo. Ami sokol ani Boyer voir maddar. Ami taka sanglem are Tiatrachea xembor vorsanchi somarombhnni asa ani tum yenai? Tannem zabab dilo, “Are mhaka ugddasuch na mure. Rav am? Hanv donuch addsoram kaddtam ani Ponnje te karyavollik yetam. Itlench shooting kelem.
Xembor vorsanchea dobajeache karyavollik poilem tem clipping pordear dakoilem ani teach khinnak Boyer zo aple ghora lagim maddar voir addsoram kaddtalo to tich nhesonn nhesun Ponnje Kala Akademiche machier bhitor sorlo. Lokanchea hanxeacho khollkholl ani talliancho ghonnghonn zalo.
Xevottak
Amcho tiatr machier dakoitana ami kitem-kitem kortanv tem, mhonnche ‘background music’, ‘light effects’, ‘prompting’ nastana bhurge machier aplem kam’ kortat tem to barik pollevn amkam xabaski ditalo. Oxe anik zaitea zannam lagim Boyer-a vixinche onnbhov astole te ekttaim korun fuddle pillgek samballun dovorpachi taktikechi goroz asa. Khorench M. Boyer, Tiatr palkacho jadugar – Gõykaranchea kallzamni sasnnak jivo urtolo mhunn mhaka khatri asa. Tache familik buzvonn ani tachea otmeak sasnnik xanti magtam.

Tomazinho Cardozo

www.v-ixtt.com