'Rajkaronn' - amdar-montreanchi kotha

'Rajkaronn'
amdar-montreanchi kotha



'Politics is a dirty game,' oxem Inglezint mhonnlolem asa. Rajkaronnant poddttoch monis aplem monisponn visrun, apleachench chintun, kiteim korunk xokta. Rajkaronnank lagon zaiteam tornatteamcho fuddar bigoddla, kitlech kuttumb nisontonnachea margar pavleat.
Oldrin Sequeira-an boroun, sador kel'lo tiatr 'Rajkaronn' amchea kaim amdar-montreancher lokx oddun, rajkaronnant choltolea kaim vaitt sonvoim-ancher uzvadd ghalta.

Rajkaronnant choltolea broxttachara-add zhuz manddunk virodhi pokxacho fuddari Devika (Tracy) vavurta. Tika aple vatten oddun haddlear odhik borem zatolem, oxem chintun, mukhel montri (Ali) ani tache dog chamcha, Raj de media (Philip) ani dhondekar Franklin (Franklin) tika bhett diun, aplim porbim patthoitat.
Punn sota khatir-uch apunn sodanch vavurteli mhonn 'iron lady' Devika tankam spoxtt korta. Devikacho ekttoch put, Joshua (Oldrin) aplem xikop purem korun, IPS officer zata ani tachem 'posting' Gõyantuch zata. Tichi dhuv Sakshi (Senida) aplem fuddlem xikop purem korun, nokrek lagta.

Vikalleam okdamchea dhondeant misoll aslolo dhondekar Franklin Joshua-ak sampoddta. Punn tacho vhoddil thoimsor ieon, mukhel montri ani potrkarachea adaran Franklin-ak rokddich suttka favo zata ani boltoch opradhi tharta. Potrkar Raj aplea ixtta Franklin-ak samballunk, aplem potrakarachi zobabdari visrun, aplea potrar vegllich batmi chhapun, sot lipoun dovorta.

Devika rajkaronnant misoll zaun, aplea kuttumbachi zobabdari visrun, aplea bhurgeank vell diunk visorta. Durlokxak lagon, tichi dhuv vaitt ixttanchea sangata bhonvta ani choriamni 'rave parties-ank vikallim vokhtam gheta.
Sorkar IPS officer-cho sotkar korunk ievjitana, promanikponnan jieupi Joshua sot uzvaddak haddunk proitn korta. Punn sot uzvaddak ailear, mukhel montreacho, potrakaracho ani dhondekaracho fuddar kallokant poddtolo, hem chintun, aplea putak jivexim marunk Franklin Devika-k suchoita. Vangddach, to tiche dhuvek 'kidnap' korta.
Devika koslim panvlam marta kai? Panvlam martoch, tichea kuttumbacho xevott koso ani koslo zata kai? Tem sogllem tiatrachea dusrea bhagant polleonk mellta.

Komedi babtint, Kenny, Saldy, Jane ani Anthony eka-mekak sangat diun, lokak bhorpur hansoitat. Toxench kantaram vixim, Connie M-an gailolem 'Tiatristank Odhik Man', Roque Dias-achem 'Khore Konknni Mogi', Bonny Dias-achem 'Duddvank Lagon' ani Roque-Bonny-Connie M-hanchem 'Opradheank Xikxa' aikopa sarkhim aslim ani boro sondex ditalim. Digdorspi Uloita: Oldrin Sequeira 18 vorsanche pirayer Konknni machyer paim ghalo ani poilech pavtt Seby de Majorda-chea 'Savlli' tiatrant nachlo. Tea uprant, bhava Elvis Sequeira-achea 'Mhozo Rekad Di' hea tiatrant nachunk sondhi mell'li.
*Mhozo poiloch tiatr 'Amchi Bhumika Sompta' machier haddlo ani boro ievkar mell'lo.

*Somajik vixoyancher lokx ghalun, vegllech nodren tiatr sador korunk mhozo anvddo.

*Spordha (competition) asa dekhun az tiatr chalu asat ani te spordhek lagunuch tiatracho dorzo vaddla. Tiatr unchlea panvddear pavla.

*Loka koddlean novea digdorspeank ut'tejon mellona. Digdorspeachem ani kolakaranchim nanvam polleon, lok tiatrak dhanvta. Toxem zaunk favona.



P. Agxekar
www.v-ixtt.com