Aiz Hanv Faleam Tum

Aiz Hanv Faleam Tum

Zantteamche upodre spoxtt korta



Xikop gheun, zannvayen ani duddvamni bhorla dekhun, tujea o-xikxit ani nennar aslolea avoi-bapaik kikont korun, tankam azilant ghalop sarkhem na. Az tuzo-avoi-bapui zantto toso, faleam tum-i teach bhesar pavtoloi mhonn Prince Jacob aplea 'Az Hanv, Faleam Tum' hea tiatrant dakholl korta.

Veg-veglle kuttumbache dekhave machier dakhoun, thoimsor ghoddtolea torekvar ghoddnitancher ani zantteamchea onnbhovacher uzvadd ghatlolo amkam mellta.
Ek tiatrist, Roy de Zuari (Jr Reagan) aplo novo tiatr borounk proitn kortana, taka vatter asromantli ek madr (Hazel Fernandes) taka bhett'ta. Ti taka 'Asro' hea asromant vhorta ani thoimsor asloleam zantteamchi ollokh korun dita.
Zantteam modhem Roy-ak Alu (Prince Jacob) ani Salu (comedian Humbert)-chi ollokh mellta. Toxench, Antonio de Pombasa (Cajetan de Curtorim) sodanch kuxal ani hatant gitar gheun, kantaram gaiit aslolo taka bhett'ta.

Punn tanche modhem Jose (Joe Rose) eka kodelir bosun, sogllo dukhest ani chintest aslolo Roy polleta. Aplea puta Kevin (Bernard Fernandes)-achem chintun, fuddlem xikop korunk taka Canada dhaddun, apnnem vhodd chuk keli mhonn Jose Roy-ak sangta. Ani tea tharavak lagon, apunn azilant koso pavlom, tem Jose tea tornatteak 'flashback'-a udexim spoxtt korta.

Anink eka kuttumbant apli sunek Melisa (Annie Quadros) bhurgem na dekhun, tichi sasumaim Maria (Diana Fernandes) tika kenddtta ani ghorkar Oswald (Simon Gonsalves)-a ani tiche modhem futt ghalunk proitn korta. Vangddach, logn zal'le aple dhuve Fiona (Rosy Travasso)-k aplea sangata dovrun, tika aplea ghova sorxil'lem pois dovrunk Maria soglle proitn korta. Sorv-xevttim apunnuch ghor soddun, azilant koxi pavli, tem sot Maria spoxtt korta. Dusrea eka ghorabeant Albert (Joe Rose) ani Celine (Annie Quadros) aplea lognacho bhangara utsov monoitana ani Mumboi aslolea aplea bhurgeanchi vatt polletana, okosmat kallzacho atak ieon, Albert thoinch sompta. Punn aplea bhurgeamcho novean ekvott zaunk, Celine aplea ghorkarachea mornnacho ghutt tanche koddlean lipoun dovorta.

Punn to ghutt, ghuttuch urta kai? Bhurgeank tem sot koxem ugddapem zata tem tiatrachea dusrea bhagant bhes bore toren dakhoilolem asa.
Komedi babtint, Prince Jacob, comedian Humbert ani Cajetan de Curtorim azilant eka-mekak boro sangat diun, lokak bhorpur hansoitat.

Kantaram babtint, Cajetan de Curtorim-achem 'Pinzreant Suknnim', Annie ani Hazel-anchem 'Ostorechem Gulamponn', Prince Jacob ani Humbert-anchem 'Infernachi Khobor', Jr Reagan-achem 'Suropai Cheddvachi', Joe Rose-achem 'Bhavart-Visvas' ani Humbert-Jr Reagan-Prince Jacob-anchem 'Tiatristancho Durupeog' aikopa sarkhim aslim ani boro sondex ditalim.

P Agekar
V-Ixtt.com