Mhojea Monantlem………Nakesh Borker

Mhojea Monantlem………

Him Motiam Amchim…..Utorddechim
Borovpi: Nakesh Borker

Eka vorsa uprant, Setembrachea mhoineant hanv Kuwait thaun mhojea ganv-ghara paulo teddna mhoje khoxek ani umedik xim-mer nasli. Familik, chodd korun mhojea bhurgeank vengent ghevpachi umollxik chodduch lagleli ti purai zali. Ganvant bhovtana pois zal'le ixtt-mitr porot mevle ani jivak anond zalo. Osoch ek dis Lourdes Saibinnichea Igorjexim vetana mhoji ani John Elvin Silva hachi bhett zali. Khobor ghetlea uprant apunn Padri zata mhunn mhaka tannem kolloilem. Mhaka anond zalo. Buffelo Soldier hem Inglez git tannem ek pautt machier gailolem ani teddnachean to ak'ke ganvant famad zal’lo.. Mhoji ani tachi chodd pavtt bhett zaunk nasli, kharann to Pilar aplem padriponnachem xikop ghetalo. Zaitea tempan porot amchi bhett zali, ti yadostik zaun,kallzant urli.

May 5ver 1987 vorsan, hea disa, amkam Utod'dekarank Padri favo zal'lo to zaun asa Fr. Lourdin Pereira. Tachea adim anikui amche ganvche Padri zaleat. Punn, 22 vorsam uprant amkam Fr. John Elvin Silva hachea rupan Padri favo zala hi ek khoxechi gozal. Zonn eka Utod'dekarak obhimanan bhorpa sarki gozal. Otumbrache 9 tarker, sanjechea 3.45 vorar Padriponnak vengoupacho dobazo Lourdes Saibinniche Igorjent suru zal'lo. Mhojean to kosoch chukounk zalo na, tea pasot survatek te xevttak porian hanv hea dobajeak hazir ravlom. Suvallo ekdom vevosthit toren ghoddoun hadlolo. Bhoumanest Archbishop Rev. Filipe Neri Ferrao hachim godd godd utram ani Fr. John hachem kantar ani dinvasnnechim mhovall utram aikon mon ani kalliz dhadoslem. Xevttak Fr. John Elvin hachea hatacho umo ghevun hanv ghara portolo. Mon trupth zalem. Kallzak khos bhogli. Amchea ganvank anik ek moladik moti favo zalem mhunn. Punn ek monant vichar azunui addkollta. Ani kitlea vorsamni Utod'dekarank novo Padri favo zatlo kai? Beginuch zalear puro.
Utod'decho amcho ganv lhan khoro, punn Lourdes Saibinnichea axirvadan motiamni bhorlolo. 2008 vorsant, amcho Utorda ganv, chodduch fanklo. Lino B Dourado hachem, "Aitaracheo Katkutleo" hem nibondh pustok, toxench khas mhozo "YAD TUJI" ho kovitancho jhelo prokaxit zalo. Goa Arts and Cultural, Social Centre hannim ghoddoun haddlolea All Goa Mando Festival, 2008 hea spordhent, Mestri Alvaro Pereira, hachea fuddarponna khala Harmonizer's Choir Of Utorda hea Utod'dechea pongddak poilem inam favo zalem. Pai Tiatrist, Joao Agustinho Fernandes hachea ugddasak Goa Konknni Academi hannim ghoddour haddlolea Tiatr Script Writing spordhent, mhalgoddo tiatrist Shri Vitorin Pereira hankam poilem inam lablo. Toxench Shri Master Vaz hancho put Shri Marcus Vaz hankam, Jack De Sequeira Award ho puroskar favo zalo. Ami heo gozali aikoleat ani vachleat, punn porot ek pavtt osleo godd gozali vachtoch, amchea kallzant Utod'dechem vhoddponn tajem zata oxem mhaka dista.

Utod'dekaranchea noxibant anikui godd gozali ghoddleo. International Youth Orchestra, Sonidos De La Tierra (Sounds Of The Earth), zo Switzerland, Austria ani Germany hea desant ghoddoun hadlolo. Hea orchestrant purai Bharatantlean 6 zannachi nemnnuk zaloli. Tantlim dogam zann Goenchim aslim ani tantuntlem ek Utod'dechem, Shri Alvaro Pereira hachi dhuv Ms. Sacha Pereira hicho aspav aslo. Amkam Utordekarank hi ek obhimanachi gozal.

Toxench novich ghoddoun haddloli Tiatr Academy of Goa, he sounsthechi ugtavnni amcheach ganvcho adlo gazlolo tiatrist, Shri Master Vaz hannem keli. Goy serkaran Shri Master Vazak jivit-puroskar bhettoun bhoumanui kelo. Tea uprant, Utod'dekarank ani ek vhoddponnachem ani tust korpa sarkem chepem favo zalem. Keith Jack Antao hannem Kingfisher Voice Of Goa¬ 2008 ho pezadik nanvvosto puroskar zoddlo ani Utod'dechem nanv Goybhor gazoilem. Keith-bab jedna apleo suttio monoupak halinch Kuwait ailolo teddna, United Club Of Utorda-Kuwait, hannim mogachi bhett divun tacho bhouman kelo.

Oxinch zaitim motiam amchea Utod'dechea ganvant utponn zalim, porzollim ani Utod'dechea ganvchem nanv tannim famad kelem: Footballachea mollar amcho Marcus Pacheco porzollo ani porzollot asa.. Shri Alvaro Pereira ani tachim bhurgim toxench Tony Rodrigues, Celso ani Brauleo Soares, Kevin Juliao toxech anikui zaite songitkar songitachea' mollar porzolltat. Tiatrachea mollar, Shri Master Vaz, Marcus Vaz; Shri Vitorin Pereira, Bonny/Antonette Pereira, Epa de Paroda, Constancio ani Edward, Estibeiro, Pal Soares ani herui zaite tiatrist porzolle ani porzollot asat. Toxech zaite Utod'dekar Dotor, Izner, Vokil, Padri adi adi zaun amchea Utod'dechea ganvak tanni prosid'di haddlea. Soglea Utod'dekaranchea votin mhoje tumkam pronnam. Lourdes Saibinnin amchea ganvcher kurpa ghalchi, amchi rakhonn korchi ani oslinch zaitim motiam amkam favo korchim. Punn azunui mhaka dista... Sorgest Maestro Martin Dourado, toxench borem gavpin ani tiatrist sorgest Bai Caroline Rodrigues, hanchea sarkim motiam amkam Utodd'dekarank anikui favo zaunk zai

Sogleank tumkam Lourdes Saibinnichi porob, khoxechi umedichi zaunk hanv anvddetam. Amchea ganvchea porjek, chodd korun tornatteank, Lourdes Saibinnin ghottai ani bori bholaiki diuchi, soroll vatt dakhounchi ani amkam Padri, Songitkar, Khellgoddi, Xikxonntadnya (Educationists), Dotor, Izner, Vokil ani borea monache Utod’dekar Lourdes Saibinnin favo korche hech amche anvdde zaumdi. Kiteak amche tornatte vegllea vegllea kxetranim (fields) porzolle tor, ani konnem-i amkam vicharlem zalear tankam gorv-obhimanan sangonk melltele, Him Motiam Amchim Utorddechim.

(Utod'dechem nanv prosid'd korpi sogleach monxachea nanvancho havem ul'lekh korunk hanv xoklo na. Tea pasot, konnech khont dhorchi nhoi. Dev Borem Korum).


http://aitaracheokaskuleo.blogspot.com/

The writer, based in Kuwait, can be contacted at nakesh26@rediffmail.com

[Photos/pictures added from Net resources].